चुहिएको छानो

Pexels

कविता

तल छु म 

कहिले सुतेको हुन्छु

कहिले पलेटी कसेर 

योजना बनाउदै हुन्छु

एकातिर झरि छ

असारको महिना

म माथी तला छ

तला माथी खरको छानो

आकासे झरी 

थेचारिन्छ धुरिमा

मक्किएको पाँजो खरको

कतै कालो,कतै गिलो

छटपटाउछु भुइतलामा

उक्लिन्छु भर्‍याङ

पन्छाउछु ढोका 

तप्प-तप्प पानी

खस्छ म माथी

प्रयास गर्छु टाल्न

चुहिएको छानो

यता टाल्छु

उता चुहिन्छ

उता टाल्छु

यता चुहिन्छ

खरको छानो

मक्किएको छानो

गिलो-भिजेको छानो

जता थिच्यो

उतै प्वाल पर्छ

जता हेर्‍यो 

लपक्क भिजेको

टाल्नु छ छानो

त्यो झरिको उपद्रो

यो छानोको विवसता

कम्मर थिचेर तङ्ग्रीन्छु

हेर्दै रमिता 

प्वाल परेको छानो!

रसिलो छानो

चुहिएको छानो।